عبدالله العويس | موقع عبدالله العويس

عود يا الـمــيعاد بوعودك

                          لو على مَطْل الوعد.. عادي

ناح موعودك على عودك

                          وْ لا ظِهَر طيرك على اعوادي

هام مبعودك ولا يْرودك

                            والعطش عطّشته عنادي

من ودادك بت محسودك

                           وْلا عرفْت اشْكال حسّادي

دمت مفنودي ومفنودك

                             لا تحاتي حيلة اضدادي

دامني ما زلت مقصودك

                              تعتدل في عيني اعيادي

حد من حسناه في قودك

                          وْحد لو تصخي له .. يْعادي

لو قلت حـــبّك وايد

                               الوايد ما وفاك

في بستان القصايد

                             غنّيت انا معناك

حال الغريب العايد

                             الحـــــال فـــي ملقاك

أشربْك حبٍّ زايد

                              بـــــالشوق واتـــهنّاك

واعيش بك متعايد

                             طـــول الحياه وياك

يا لذّات الوعايد

                            المــــــــوت فـــــي فرقاك

يَــر انفاسي وقايد

                             مـــــــن روح تتفدّاك

عقبك عفت الوسايد

                           والحــــــال ما يخفاك

ليش ما تتطّالع اصحابك

                                    واتّطالع مـــــــــنّه و مــــــــــنّه

مات يا الشّحّاح طلاّبك

                                 و ان عطيته منّه  فـْ  منّه

ضاع يوم عْتابك حسابك

                                 و العتب له درسٍ و سِنّه

دام ما تنشد عن احبابك

                                 لا  تميل الـــــرّاي و تظــــنّه

عد كم دّقيت انا بابك

                                   قــــــــلب والحرّات يصلنّه

واهي الآهات ما يابك

                                  والــــــــزّقر ما تفهمه فـــــــنّه

ما تشوف القلب يرضى بك

                                 ع الذي سوّيت و تكـــــنّه؟

سيرةٍ بتكمّل كتابك

                                   بالـــــــنّدم ودٍّ مـــــضى غـــنّه

ياليت انا لي عشرة احضان

                                    أبغـــي أوَفـِّي لــــي مضانين

هذا يبى للشوق برهان

                               وهذاك له م الشوق شوقين

واللّي غمرني بلطف تحنان

                                   بعطيه روح و قلبٍ و عيـن

أخاف عن يختل ميزان

                                   في الود و تضيع البراهين

سوّيت م الاحساس بستان

                                    واقول يا الغالين والين

بي شرط وِد و حق خلاّن

                                   واعَرْف دربه ينتهي وين 

رد الغرام اللّي عطيتك

                                   كلّه و حتى الشعر ردّه

عِد الخطى لي يَتْك بيتك

                                    بَتْــــــعرف قلبي كم ودّه

بَطلاب نفس بْحب ييتك

                                باشواق فيها احوال عدّه

يا معلنٍ بالصد ليتك

                                  قدّرت من قدّرْك عنده

يا قلب لو بَوْصيك تنساه

                               إن ياك داعي الود لبّــــــــه

لو في طِباعه نوع مجفاه

                                واهيك م الحسرات خبّه

و ان شفت في المطلاع شرواه 

                                   واريك للاّفين شِــــــبّه

يمكن  يكون الغالي اوياه

                               و يْحــــــــــــــــصِّل المشتاق حَبّه

غبت عني و اشتبه ظنّي

                               يوم يتني عقبك اجناسي

من عرفتك وانت متأنّي

                             في الوصل و تحاتي الناسي

ليتني  .. و ابغى .. و متمنّي

                            قول منْك وما به احساسي

لو احيدك دوم متعنّي

                               كان عــــــذّرتك عذر ناســــي

شاطر الاّ تمتدح  فنّي

                            وفي المصاب تزور و تواسي

هو هذا وذاك مرضنّي

                                 لا و لا يكفيني اتماسي

ييت أو ما ييتك ..تغنّي!

                                 ليت مره ..مره تجاسي

ابتدينا في الهوى اثنينه

                                   و افترقنا  قلوبنا عشره

و الوداد اللي مراضينه

                                  رد من عقب  اللقا يشره

كيف له بيرجّع سنينه

                                يوم طارت  في الهوى نشره

مثل ما وقتٍ مْعَيْدينه

                              جمع شوقٍ و انقضى حشره

ما ادمعت عيني  و لا عينه

                                   بِعـــْـــــــد والاخبار منتشره

حب و العشاق ناسينه

                                    دام كلٍ في الهوى عشره

قربت ساعة تلاقينا

                               ياحبيب الروح في بلادك

افترقنا في ضحى  اثنينا

                                واللقا في ساعة ارقادك

يوم ناس الحي غافينا

                               لو عشاني طول اسهادك

بنتصافح بس بيدينا

                                وانت ساير تبغي وْسادك

في النهار  الغافل ايّينا

                              كيف و احنا بين حسادك

بنتواعد في ملافينا

                                 يا محبي بسمع انشادك

لك بغني بالتلاحينا

                              دوم و المعنى  على امرادك

ما كفانا ود ماضينا        

                             حط حاضرنا على امجادك

في الحب عندي وصف قصّه

                                   اثنين حبوا حب غربال

الاوّليى غاليه رصّـــــــــــــــــه

                                  وثّق عليه  حبال و حبال

خصه بشيٍ ما يخصّه

                                 من فرط ما يهواه  يحتال

والثاني اللى قال غصّه

                                     كذاب يبغى حب عيّال

شي من حديثه دس نصّه

                             و اظهر لذي  في وصفه يقال

في الحب كلٍ نال حصّه

                                  إلاّ هــــــــــواهم عشرة امثال